Litteræ Stephani, prioris de Caritate, quibus exorat fratres Cluniacenses, ut fratri Columbo, qui pergit Cluniacum ibidem commoraturus, favorem debitum impendant.
Venerabilibus et karissimis patribus domno O. priori et J. priori claustrali, ceterisque dominis de ordine Cluniacensi, frater Stephanus, prior humilis de Karitate, perpetuam obedientiam et reverentiam cum salute. Notum facimus vestræ paternitati, quod dilectus frater noster Columbus, lator præsentium, vadit de nostra licentia Cluniacum. Quamquam illius socialis præsentia nobis esset utilis et benigna, negare ei non potuimus gratiam recedendi, et Cluniaci præcipue commorandi, nostras preces nihilominus porrigentes ampliores quas possumus pro eodem, cujus conversationem Deo et hominibus gratam credimus et acceptam. Unde vos exoramus suppliciter et rogamus, quatinus eidem digne pro meritis tam liberaliter quam misericorditer favorem debitum impendatis, ut a summo retributore vestra pro impensis caritas recompensationem recipiat abundantem. Datum in festo beati Lucæ.